Azərbaycanda minimum əmək haqqı 2027-ci ilin yanvarından artırıla bilər

Azərbaycanda minimum əmək haqqının 2027-ci ilin yanvarından artırıla biləcəyi bildirilir. Day.Az-ın xəbərinə görə, bunu Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov Modern.az-a müsahibəsində açıqlayıb. Deputatın sözlərinə görə, artımın məbləği müəyyənləşdirilərkən inflyasiya göstəriciləri ilə yanaşı, gələn il üzrə qiymət artımının proqnozları da nəzərə alınacaq.

Liberal İqtisadçılar Mərkəzinin sədri Akif Nəsirli "Bakupost"a bildirib ki, qəbul olunan son qanuna görə minimum əmək haqqına hər ilin əvvəlində baxılmalı və əlavələr edilməlidir. Onun təcrübəyə əsaslanan qiymətləndirməsinə görə, minimum əmək haqqı ən azı 50 manat artırıla bilər. Lakin o, bu məbləğin 2025-ci ildə minimum əmək haqqı sonuncu dəfə artırıldığı vaxtdan bəri yaranan inflyasiyanı kompensasiya etmədiyini bildirib və minimum əmək haqqının azı 500 manat civarında olmasını daha məqbul hesab edib.

Nəsirli həmçinin Azərbaycan hökumətinin 2001-ci ildə Avropa Əmək Xartiyası qarşısında götürdüyü öhdəliyə işarə edib. Həmin öhdəliyə görə, minimum əmək haqqı 2006-cı ilə qədər orta aylıq əmək haqqının 60 faizinə çatdırılmalı idi. Onun sözlərinə görə, aradan 25 il keçməsinə baxmayaraq, hökumət hələ də bu öhdəliyi yerinə yetirməyib.