Türkmenistanyň Prezidenti Serdar Berdimuhamedowa Hacettepe uniwersitetinden hormatly doktorlyk

Türkmenistanyň Prezidenti Serdar Berdimuhamedow Türkiýä sapary wagtynda 30 oktýabrda Ankaradaky Hacettepe uniwersitetinde Halkara gatnaşyklary ugry boýunça hormatly doktorlyk derejesini aldy. Bu barada Türkiýäniň Wise-prezidenti Jewdet Ýylmazyň resmi X sahypasynda habar berildi.

Bu dabarada Ýylmaz bilen bir hatarda uniwersitetiň ýolbaşçylygy, akademiki jemgyýet we beýleki resmi adamlar gatnaşdy. Çärede Türkiýe bilen Türkmenistanyň arasyndaky dostluk gatnaşyklarynyň we ylym, bilim, tehnologiýa hem ýokary okuw mekdepleriniň arasyndaky hyzmatdaşlygyň ähmiýeti nygtaldy.

Ýylmaz çykyşynda türk döwletleriniň arasyndaky hyzmatdaşlygyň umumy taryh, dil we medeniýet bilen bir hatarda ylmy we akademiki baglanyşyklary hem öz içine almalydygyny aýtdy. Ol uniwersitetleriň arasyndaky hyzmatdaşlygy giňeltmegiň, bilelikdäki ylmy gözlegleri ösdürmegiň we ýokary bilim ulgamyndaky baglanyşyklary berkitmegiň möhümdigini nygtady.