Turkmaniston Prezidenti Serdar Berdimuhamedovga Hacettepe universitetidan faxriy doktorlik

Turkmaniston Prezidenti Serdar Berdimuhamedovga Turkiyaga tashrifi davomida 30 oktabrda Anqaradagi Hacettepe universitetida Xalqaro munosabatlar yoʻnalishi boʻyicha faxriy doktorlik darajasi topshirildi. Bu haqda Turkiya Vitse-prezidenti Cevdet Yilmazning rasmiy X sahifasida xabar berildi.

Marosimda Yilmaz bilan birga universitet rahbariyati, akademik jamoatchilik va boshqa rasmiy shaxslar ishtirok etdi. Tadbirda Turkiya va Turkmaniston oʻrtasidagi doʻstona munosabatlar hamda fan, taʼlim, texnologiya va oliy oʻquv yurtlari oʻrtasidagi hamkorlikning ahamiyati taʼkidlandi.

Yilmaz nutqida turkiy davlatlar oʻrtasidagi hamkorlik umumiy tarix, til va madaniyat bilan birga ilmiy va akademik aloqalarni ham qamrab olishi kerakligini aytdi. U universitetlar oʻrtasidagi hamkorlikni kengaytirish, qoʻshma ilmiy tadqiqotlarni rivojlantirish va oliy taʼlim sohasidagi aloqalarni mustahkamlash muhimligini taʼkidladi.