Qozogʻistonda 70 yildan ortiq vaqt ichida birinchi marta urgʻochi yoʻlbars tabiatga qoʻyib yuborildi

Qozogʻistonda 70 yildan ortiq vaqt ichida birinchi marta urgʻochi yoʻlbars tabiatga qoʻyib yuborildi. Umit ismli yoʻlbars endi Ili-Balxash davlat tabiat qoʻriqxonasi hududida yashaydi, mutaxassislar esa uning harakatlarini sunʼiy yoʻldosh tasmasi yordamida kuzatmoqda. Ekologiya va tabiiy resurslar vazirligining xabar berishicha, hayvon 2026-yil 31-iyulda ozodlikka chiqarilgan.

Umit 2026-yil 8-mayda Rossiyadan Qozogʻistonga olib kelingan toʻrt nafar Amur yoʻlbarsidan biridir. Hayvonlar Xabarovskdan Olmaotaga samolyotda olib kelinib, soʻng ikkita vertolyotda qoʻriqxonaga yetkazilgan. Rossiya Qozogʻistonga 3,5 yoshli bir erkak va bir urgʻochi katta yoʻlbars hamda olti oylik ikki bolani bepul topshirgan. Yoʻlbarslarga Amur, Umit, Turan va Ussuri ismlari berilgan.

Katta yoʻlbarslar tabiatga chiqarishdan oldin karantindan oʻtgan hamda ov koʻnikmalari va odamlardan qochish qobiliyati sinovdan oʻtkazilgan. Bu jarayon bir oydan bir yarim oygacha davom etgan. Bolalar uchun 1,5–2 yoshga yetguncha davom etadigan uzoqroq moslashish davri nazarda tutilgan. Qoʻriqxona 2018-yilda Olmaota viloyatining Balxash tumanida tashkil etilgan boʻlib, maydoni 450 ming gektardan ortiq. Vazirlik yoʻlbarslarni tabiatga qaytarish bosqichma-bosqich davom etishini bildirdi.