Ozarbayjon 2035-yilgacha elektr plitalariga oʻtishni rejalashtirmoqda

Vazirlar Mahkamasi “Ozarbayjonning past uglerodli rivojlanishi boʻyicha uzoq muddatli strategiya”ni tasdiqladi. Qarorni Bosh vazir Ali Asadov imzoladi. Hujjatga koʻra, turar-joy binolarida elektr plitalariga oʻtish maqsadi 2035-yilgacha belgilangan. Qayta tiklanuvchi manbalardan olingan elektr energiyasidan foydalanish qoʻllab-quvvatlanadi va shahar hamda qishloq hududlarida elektr plitalarini oʻrnatish ragʻbatlantiriladi.

Strategiya 2060-yilga borib shartli “sof nol emissiya” maqsadini koʻzda tutadi. Uni amalga oshirish xalqaro qoʻllab-quvvatlash, texnologiya transferi, imtiyozli kreditlar va xususiy sektor investitsiyalariga bogʻliq boʻladi. Hujjatda 2060-yilgacha barcha binolarda elektr plitalari ulushini 100 foizga yetkazish va barcha yangi binolarda ularni majburiy qilish rejalashtirilgan.

Iqtisodiyot vazirligi dekarbonizatsiya choralarini davlat dasturlariga integratsiya qilishni muvofiqlashtiradi, Moliya vazirligi esa ularni moliyalashtiradi. Ekologiya va tabiiy resurslar vazirligi strategiyani BMT Iqlim oʻzgarishi boʻyicha Ramka konventsiyasi kotibiyatiga taqdim etadi va har ikki yilda monitoring natijalarini Davlat iqlim oʻzgarishi komissiyasiga taqdim etadi.