Qozogʻiston va Gruziya tashqi ishlar vazirlari hamkorlik hamda Transkaspiy yoʻlakni muhokama qildi

Qozogʻiston tashqi ishlar vaziri Muxtor Tleuberdi Gruziya Bosh vazir oʻrinbosari va tashqi ishlar vaziri Maka Bochorishvili bilan uchrashdi. Qozogʻiston Tashqi ishlar vazirligi matbuot xizmatining xabar berishicha, tomonlar ikki tomonlama munosabatlarning dolzarb masalalari va strategik hamkorlikni mustahkamlash istiqbollarini muhokama qilgan.

Uchrashuvda siyosiy muloqotni mustahkamlash, savdo-iqtisodiy aloqalarni kengaytirish, tranzit transport hamkorligi hamda madaniy-gumanitar sohadagi aloqalarni chuqurlashtirish masalalari koʻrib chiqildi. Shuningdek, yuqori va oliy darajadagi aloqalar rejalari hamda koʻp tomonlama tashkilotlar doirasidagi xalqaro va mintaqaviy kun tartibi muhokama qilindi.

Alohida eʼtibor Transkaspiy xalqaro transport yoʻlagini rivojlantirishga qaratildi. Ustuvor yoʻnalishlar orasida transport infratuzilmasini modernizatsiya qilishni muvofiqlashtirish, portlar va temir yoʻllar samaradorligini oshirish, tarif shartlarini yaxshilash hamda elektron hujjat aylanmasiga oʻtish bor. Tomonlar Markaziy Osiyo va Janubiy Kavkaz oʻrtasidagi transport aloqalari Yevropa bozorlariga chiqish uchun muhim ahamiyatga ega ekanini taʼkidlab, muntazam aloqalarni davom ettirishga tayyorliklarini tasdiqladilar.