Turkmanistonda Mari viloyatida yiliga 50 ming tonna sut qayta ishlaydigan zavod ochildi

Turkmaniston Sanoatchilar va tadbirkorlar uyushmasining aʼzosi boʻlgan “Täze aý önümleri” iqtisodiy jamiyati tomonidan boshqariladigan yirik sut qayta ishlash zavodining ochilish marosimi Mari viloyatining Mari etrapidagi “Täze oba” dehqon birlashmasi hududida oʻtkazildi. Zavod yiliga 50 ming tonna sutni qayta ishlashga moʻljallangan. Korxona 3,5 gektar maydonda joylashgan boʻlib, ikki gektari ishlab chiqarish binolariga ajratilgan.

Majmua “Täze aý” brendi ostida qaymoq, kefir, qatiq, tvorog, sariyogʻ, suzma, ayron va turli muzqaymoqlar ishlab chiqaradi. Uskunalarni Turkiya va Germaniyadagi ishlab chiqaruvchilar yetkazib bergan, korxonada 300 dan ortiq ish oʻrni yaratilgan. Xom ashyo sifatida sigir suti mahalliy aholidan, dehqon birlashmalaridan va xususiy korxonalardan sotib olinadi.

Manbaga koʻra, loyiha Qahramon-Arkadag va Turkmaniston Prezidenti Serdar Berdimuhamedovning bozor munosabatlarini rivojlantirish hamda xususiy ishlab chiqarishni kengaytirish orqali eksportni oshirishga qaratilgan saʼy-harakatlari natijasidir. Marosimda viloyat hokimligi, jamoat tashkilotlari va xususiy sektor vakillari ishtirok etdi.