Xitoy–Qirgʻiziston–Oʻzbekiston temir yoʻli: qirgʻiz qismida qurilish davom etmoqda

Xitoy–Qirgʻiziston–Oʻzbekiston temir yoʻlining Qirgʻiziston qismi boʻylab butun trassada qurilish ishlari davom etmoqda. Bu haqda “Qirgʻiz temir yoʻli” davlat korxonasi xabar berdi.

Korxona maʼlumotiga koʻra, loyihada nazarda tutilgan 29 ta tunneldan 28 tasida ishlar olib borilmoqda, bitta tunnel esa toʻliq oʻtib boʻlingan. Qurilishchilar, shuningdek, rejalashtirilgan 50 ta koʻprikning 47 tasida ishlamoqda.

Uzunligi 304 km dan ortiq boʻlgan Qirgʻiziston qismining qurilishi 2025-yilda boshlangan. Loyiha 29 ta tunnel va 50 ta koʻprikni nazarda tutadi. Liniyaning taxminan 40 foizi tunnel va koʻpriklar orqali oʻtadi. Temir yoʻl Torugʻart – Arpa – Qoʻsh-Doʻbo – Makmal – Manas yoʻnalishi boʻylab oʻtadi va Xitoyni Qirgʻiziston hududi orqali Oʻzbekiston bilan bogʻlaydi. Bu mamlakatning tranzit va logistika imkoniyatlarini kengaytirishi kutilmoqda.