Qirgʻiziston Turkiyaning tibbiy xizmat sifatini baholash tajribasini oʻrganmoqda

Qirgʻiziston Turkiyaning tibbiy xizmatlar sifatini baholash va tibbiy tashkilotlarni akkreditatsiyadan oʻtkazish sohasidagi tajribasini qoʻllash imkoniyatini koʻrib chiqmoqda. Bu haqda Qirgʻiz Respublikasi Sogʻliqni saqlash vazirligi xabar berdi. Xabarga koʻra, Turkiyada oʻtkazilgan XII Xalqaro sogʻliqni saqlash kongressi doirasida Sogʻliqni saqlash vaziri Damir Osmonov Turk tibbiy xizmatlar sifati va akkreditatsiyasi instituti (TÜSKA) rahbari, professor Bayram Demir bilan uchrashgan.

Tomonlar tibbiy muassasalar faoliyatini baholashning xalqaro yondashuvlari, sifat standartlarini joriy etish va sogʻliqni saqlash tashkilotlarini akkreditatsiyadan oʻtkazishni muhokama qilgan. Alohida eʼtibor belgilangan sifat standartlariga muvofiqligi boʻyicha tibbiy tashkilotlarni baholaydigan TÜSKA akkreditatsiya tizimiga qaratilgan.

Vazirlikning taʼkidlashicha, Qirgʻiziston bu tajribani oʻrganishga va uni mamlakat sogʻliqni saqlash tizimi xususiyatlarini hisobga olgan holda qoʻllash imkoniyatiga qiziqmoqda. Yangi standartlarni joriy etish boʻyicha aniq kelishuvlar va muddatlar hali eʼlon qilinmagan.