Қазақстан мен Оңтүстік Корея Алматыда сирек металдарды өңдеу орталығын ашты

21 қазанда Алматыда Қазақстан-Корея сирек металдар технологиялары орталығы ашылды. Орталық Сәтбаев университетінің Металлургия және кендерді байыту институтының базасында жұмыс істейді. Ғылым және жоғары білім министрлігінің мәліметінше, екі елдің ғалымдары мен инженерлері минералдық шикізатты терең өңдеу, сирек металдарды бөліп алу және жаңа материалдар өндіру технологияларын әзірлейді. Орталықтың басты міндеті — Қазақстанда жоғары қосылған құны бар өнім шығаруды дамыту.

Жобаны Корея өнеркәсіптік технологиялар институты (KITECH) және Корея ұлттық сирек металдар институты (KORAM) жүзеге асырады. Жобаны екі ел мемлекеттік органдары қолдайды, ол Корея Республикасының ресми даму көмегі бағдарламасы аясында іске асырылуда. KORAM директоры Пак Кён Тхэ орталық сирек металдарды өңдеу және терең тазарту бойынша корей технологияларын енгізуге мүмкіндік беретінін мәлім етті.

Орталықтың Бірлескен басқару комитетінің алғашқы отырысында зертханаларды жабдықтау мерзімдері, мамандарды даярлау және кәсіпорындармен ынтымақтастық талқыланды. Сәтбаев университетінің ректоры Мейрам Бегентаев зерттеу басымдықтарының өнеркәсіптік серіктестердің өндірістік міндеттеріне сай айқындалатынын айтты.