Қазақстан Республикасы күні Ашхабадта аталып өтілді

Қазақстан Республикасының күніне орай 24 қазанда Ашхабадтағы «Йылдыз» қонақ үйінде салтанатты қабылдау өтті. Іс-шараға Түрікменстан Министрлер Кабинетінің төрағасы орынбасары Нокергулы Атагулыев, Қазақстанның Түрікменстандағы елшісі Нұрлан Ногаев, дипломатиялық корпус өкілдері, халықаралық ұйымдар және Түрікменстандағы қазақстандық қауымдастық қатысты.

Елші Ногаев екі ел арасындағы тарихи және мәдени байланыстарға, саяси, экономикалық және гуманитарлық салалардағы ынтымақтастықтың дамуына назар аударды. Ол сауда, энергетика, өнеркәсіп, көлік-логистика салаларындағы өзара іс-қимылдың маңыздылығын атап өтіп, Қазақстан–Түрікменстан–Иран дәлізін дамыту мен Каспий порттарының әлеуетін пайдалануды басым бағыттар ретінде көрсетті.

Атагулыев Түрікменстан басшылығы мен халқы атынан Қазақстанды ұлттық мерекесімен құттықтап, екі ел қарым-қатынасы көршілік дәстүрлерге және ортақ мәдениетке негізделгенін айтты. Қазақстан Республикасының күні жыл сайын 25 қазанда, 1990 жылы қабылданған Мемлекеттік егемендік туралы декларацияның құрметіне аталып өтіледі.