Жапаров ЮНЕСКОнун башкы директору менен кызматташтыкты кеңейтүүнү талкуулады

Президент Садыр Жапаров 16-октябрда Ереванда БУУнун Биологиялык ар түрдүүлүк жөнүндөгү конвенциясынын тараптарынын 17-конференциясынын (COP17) алкагындагы Лидерлер саммитинин жүрүшүндө ЮНЕСКОнун башкы директору Халед Аль-Анани менен жолуккан. Тараптар билим берүү, илим, маданият, жаштар саясаты жана санариптик технологиялар тармактарындагы кызматташтыкты, ошондой эле тарыхый жана жаратылыш мурастарын сактоо маселелерин талкуулашкан. Жапаров Кыргызстандын ЮНЕСКО менен кызматташуусунун маанилүүлүгүн белгилеп, өлкөнүн 2025–2029-жылдарга Уюмдун Аткаруу кеңешине шайланганын айткан.

Жолугушууда 2027-жылдын 21–23-октябрында Бишкек шаарында өтө турган «Бишкек+25» экинчи глобалдык тоо саммитине даярдык да талкууланып, президент башкы директорду саммитке катышууга чакырган. Жапаров ошондой эле Ысык-Көлдүн экосистемасын сактоо үчүн БУУнун колдоосу астында эл аралык трасттык фонд түзүү демилгесинин ишке ашырылышы тууралуу айтып берген. Халед Аль-Анани Жапаровдун COP17дөгү сөзүнүн маанилүүлүгүн белгилеп, Кыргызстандын көчмөн маданиятын сактоого жана жайылтууга кошкон салымын өзгөчө атап өткөн жана аны эл аралык деңгээлде таанытууга көмөк көрсөтүүгө даяр экенин айткан.