Медицинадагы жаңылануу: айлык акы, жаңы ооруканалар жана жогорку технологиялар

Кыргыз Республикасынын Саламаттык сактоо министрлигинин маалыматына ылайык, 2021–2025-жылдары республикалык бюджеттин жана башка булактардын эсебинен саламаттык сактоо мекемелеринин 21 объектиси курулуп бүткөрүлгөн. Аларды курууга жалпысынан 2 млрд 612 млн 882 миң сом жумшалган. 2026-жылы 40тан ашык саламаттык сактоо объектисинин курулушу каржыланууда, бул максатка 13 млрд 236 млн сом каралган. Бишкек шаарында беш объекттин курулушу жүрүп жатат.

Президент Садыр Жапаровдун тиешелүү жарлыгына ылайык, медициналык кызматкерлердин эмгек акысы ушул жылдын 1-апрелинен тартып 100 пайызга жогорулатылды. Жаш дарыгерлердин айлыгы 35 миң сомго, тажрыйбалуу хирургдардыкы 58 миң сомго чейин жетет. Саламаттык сактоо министри Дамирбек Осмонов мурда айлыктын төмөндүгүнөн айрым адистердин тармактан кеткенин белгиледи.

Анын үстүнө жогорку технологиялуу КАТЛАБ жүрөк-кан тамыр борборлорунун тармагы кеңейтилүүдө. Улуттук кардиология жана терапия борборунда 2026-жылдын биринчи жарым жылдыгында 3 миң 277 жогорку технологиялуу медициналык кийлигишүү жүргүзүлгөн, бул 2025-жылдын ушул мезгилиндеги 2 миң 52 процедурадан көп. 2026-жылдын майында Балыкчы шаарында ачылган КАТЛАБ борборунда 170ке жакын процедура жасалган.