Мирзиёев China Energy компаниясын Навои облусунун суу менен камсыздоо системасына инвестиция салууга чакырды

Өзбекстандын Президенти Шавкат Мирзиёев Кытайдын China Energy International компаниясын Навои облусунун суу менен камсыздоо системасына жаңы инвестициялар салууга чакырды. Бул маселе 16-октябрда мамлекет башчысынын CAMCE, China Energy жана Sinoma Energy компанияларынын жетекчилери, ошондой эле Омандын Voltamp Energy компаниясы директорлор кеңешинин төрагасы Сайид Айман аль-Бусайди менен жолугушуусунда талкууланды. Бул тууралуу президенттин пресс-кызматы билдирди.

Тараптар жаңыланма энергетика, энергияны сактоо системалары, калдыктарды кайра иштетүү жана суу менен камсыздоо тармагындагы биргелешкен долбоорлорду карап чыкты. Ошондой эле Андижан облусунда логистикалык хаб түзүү, агровольтаиканы өнүктүрүү жана мунай-газ тармагындагы долбоорлорду ишке ашыруу демилгелери колдоого алынды.

China Energy International президенти Сяо Сюэбин «Өзбекстан 24» телеканалына берген интервьюсунда жолугушууну натыйжалуу деп атады. Анын сөзүнө караганда, Мирзиёев CEEC компаниясы менен кызматташуунун маанисин өзгөчө баса белгилеп, компанияны Навои облусунун суу менен камсыздоосуна инвестициялык катышууну кеңейтүүгө чакырган. Sinoma Energy Conservation төрагасы Синьлин Мэн компаниянын Навои облусунда күн энергетикасы жана энергияны сактоо менен байланышкан биринчи долбоорун аяктаганын билдирди.