ТүркПА: Зангезур коридорунун ачылышы дүйнөлүк экономикага түрткү берет

Бишкек, 2026-жылдын 20-октябры. Кара деңиз экономикалык кызматташтык боюнча парламенттик ассамблеянын (ПАБСЕК) Баш катчысы Асаф Гажиев Бишкекте өткөн Түрк мамлекеттеринин парламенттик ассамблеясынын (ТүркПА) 15-пленардык отурумунда сөз сүйлөп, Зангезур коридорунун ачылышы дүйнөлүк экономиканын өнүгүшүнө, жаңы жумуш орундарынын түзүлүшүнө жана аймактагы тынчтыктын бекемделишине салым кошо аларын айтты.

Гажиевдин айтымында, Кара деңиз аймагынын эл аралык соода жана транспорттук байланыштардагы мааниси артып баратат. Аймак Чыгыш менен Батышты, анын ичинде Кытай менен Европанын ортосундагы багыттарды, ошондой эле Түндүк–Түштүк транспорттук коридорун байланыштырган маанилүү жол катары кызмат кылат. Ал дагы аймактын Борбордук Азия өлкөлөрүнөн жана башка мамлекеттерден түстүү металлдарды, газ менен мунайды дүйнөлүк жана европалык рынокторго жеткирүүдө стратегиялык мааниге ээ экенин белгиледи.

Гажиев Зангезур коридорунун узундугу болжол менен 40 километр экенин айтып, анын ачылышы транспорттук мүмкүнчүлүктөрдү кеңейтип, Борбордук Азиядан Европага чийки зат жана башка товарларды жеткирүүнү жеңилдетерин күтүп жатканын билдирди. Ал маселе Азербайжан менен Армения гана эмес, аймактагы башка өлкөлөргө да тиешелүү экенин баса белгилеп, мамлекеттерди бул демилгени колдоого чакырды.