Санкциялык саясат: мамлекеттик банктар 240тан ашык эсепке кызмат көрсөтүүнү токтотту

Президенттин өзгөчө тапшырмалар боюнча атайын өкүлү Бакыт Сыдыков 2026-жылдын 21-октябрында Бишкекте чет мамлекеттердин дипломатиялык өкүлчүлүктөрүнүн башчылары менен жолуккан. Экономика министрлигинин маалыматынча, жолугушууда Кыргызстандын санкциялык тобокелдиктерин азайтуу жана финансылык көзөмөлдү күчөтүү боюнча аткарылган иштер тууралуу маалымат берилген.

Сыдыков өлкөнүн финансылык системасын эл аралык санкцияларды айланып өтүү үчүн пайдаланууга жол берилбей турганын жана бул маселе өлкө жетекчилигинин жеке көзөмөлүндө экенин баса белгиледи. Жүргүзүлгөн иштердин алкагында 52 юридикалык жактын ишмердүүлүгү токтотулду, 57 юридикалык жакка карата мажбурлап жоюу жол-жоболору башталды, 25 юридикалык жак текшерилүүдө.

Мамлекеттик банктар 240тан ашык эсепти тейлөөнү токтотту. Санкциялык системага баа берүү үчүн эл аралык Kroll консалтингдик компаниясы тартылды. Бакыт Сыдыков алар менен үзгүлтүксүз жолугуп турууну пландап жатканын жана жүргүзүлүп жаткан иштер тууралуу маалымат берип турарын билдирди.