Президент: Жер басып алууга мындан ары токтом коюу керек

Кыргызстандын президенти Садыр Жапаров Тогуз-Торо районунун тургундары менен жолугушууда жер басып алууга мындан ары токтом коюу керектигин билдирди. Мамлекет башчысы 2021-жылы Сокулук, Аламүдүн райондорунда, Бишкек жана Ош шаарларынын тегерегинде республика боюнча 23-30 миңдей жарандын басып алган жерлери мыйзамдаштырылганын эскертти.

Жапаров бош тилкеге үй курган адамдарга аким, айыл өкмөттөрүнүн аралашканы аныкталганын айтты. Өлкөнүн 94% тоо, 6% гана түз жер экенин белгилеп, айдоо, жайыт жана кайрак жерлерди сактоо керектигин баса белгиледи. Ал райондун борбору жана кичи шаарларындагы жерлерде Мамлекеттик ипотекалык компания аркылуу турак жайлар курулуп жатканын билдирди.

Жыйында 2021-жылы Көк-Жарда жер тилкесин сатып алган жарандын апасы, ал учурда ал жерге үй салып жашап жатканын айтып, мыйзамдаштыруу маселесин карап берүүнү өтүндү. Курулуш министри Нурдан Орунтаев Көк-Жардагы 172-контурда жер жарыялангандан кийин салынган үйлөр бар экенин маалымдады. Президент арызды комиссиянын алкагында карап берүүнү тапшырды.