Азербайжан менен Грузия Агстафа-Гардабани багытындагы жаңы чек ара өткөрүү пунктун талкуулады

Азербайжан менен Грузиянын ортосундагы экономикалык кызматташтык боюнча өкмөттөр аралык биргелешкен комиссиянын 11-жыйыны Грузиянын Кахетия облусундагы Сигнахи шаарында өттү. Жыйынга премьер-министрлер Али Асадов менен Ираклий Кобахидзе төрагалык кылды. Бул тууралуу Азербайжандын Министрлер Кабинети кабарлады.

Жыйында соода-экономикалык, инвестициялык, энергетика, транспорт-транзит, айыл чарба, маданий-гуманитардык жана башка тармактардагы кызматташтыкты кеңейтүү маселелери талкууланды. Белгиленгендей, быйылкы алгачкы тогуз айда эки өлкөнүн соода жүгүртүүсү 42 пайызга өсүп, өткөн жылкы жалпы көрсөткүчтөн ашып, 1 миллиард АКШ долларына жакындаган.

Агстафа-Гардабани багытында биргелешкен чек ара өткөрүү пунктун түзүү долбоорунун маанилүүлүгү белгиленди. Жыйында кол коюлушу пландалган документ долбоордун ишин ылдамдатаарына ишенич билдирилди. Жыйындын аягында премьер-министрлер комиссиянын 11-жыйынынын протоколуна кол койду.