Azərbaycan və Gürcüstan Ağstafa-Qardabani sərhəd-keçid məntəqəsi layihəsini müzakirə edib

Azərbaycan və Gürcüstan arasında iqtisadi əməkdaşlıq üzrə birgə hökumətlərarası komissiyanın 11-ci iclası Gürcüstanın Kaxeti bölgəsinin Siqnaxi şəhərində Baş nazirlər Əli Əsədov və İrakli Kobaxidzenin sədrliyi ilə keçirilib. Məlumatı Nazirlər Kabineti yayıb.

İclasda ticarət-iqtisadi, investisiya, enerji, nəqliyyat-tranzit, kənd təsərrüfatı, mədəni-humanitar və digər sahələrdə əməkdaşlığın genişləndirilməsi müzakirə edilib. Bildirilib ki, cari ilin ilk doqquz ayında ikitərəfli ticarət dövriyyəsi 42 faiz artaraq ötən ilin ümumi göstəricisini üstələyib və 1 milyard ABŞ dollarına yaxınlaşıb.

Ağstafa-Qardabani istiqamətində "İpək Yolu (Ağstafa) - Abreşumis Qza (Qardabani)" birgə sərhəd-keçid məntəqəsinin yaradılması layihəsinin əhəmiyyəti vurğulanıb. İclasın yekununda Baş nazirlər komissiyanın 11-ci iclasının Protokolunu imzalayıblar.