Азербайжан Түштүк Кавказда согуштун ордуна соодаӊ тандап жатат: Хикмет Гаджиев Джеффри Сакс менен сүйлөштү

Азербайжан Түштүк Кавказды геосаясий карама-каршылык аймагынан экономикалык кызматташтык, аймактык байланыш жана туруктуу тынчтык платформасына айландырууга умтулууда. Бул тууралуу Азербайжан Президентинин жардамчысы жана Президент администрациясынын Тышкы саясат иштери бөлүмүнүн жетекчиси Хикмет Гаджиев билдирди. Ал бул пикирлерин Бакуда америкалык экономист жана профессор Джеффри Сакс менен болгон сүйлөшүүдө айтты. Видеотасма анын расмий X каттоо эсебинде жарыяланды.

Гаджиев аймакты «чоң державалардын согуш талаасы» эмес, «чоң державалардын рыногу» кылуу ниетинде экенин билдирди. Ал 1994-жылдагы «Кылымдын келишими» соода согуштан алда канча жакшы экенин далилдегенин белгиледи. Ошондой эле Европа комиссиясынын төрагасы Урсула фон дер Ляйендин жакында болгон сапары учурунда Каспий деңизинен Европанын электр тармагына чейин созулган жашыл энергия коридору талкууланганын айтты. Анын сөзүнө караганда, Азербайжан бир нече жылдын ичинде 2 ГВт, андан кийин дагы 8 ГВт калыбына келтирилүүчү энергия кубаттуулугун кошуп, бардыгын экспортко чыгарууга даяр.

Гаджиев бул максаттарды Армения менен тынчтык процесси менен байланыштырып: «Биз түбөлүк тынчтык жолун тандадык», деди. Ал Азербайжан келечектеги кыйынчылыктарга туруштук бере турган аймактык коопсуздук архитектурасын куруу ниетинде экенин кошумчалады.