Грузия менен Азербайжан чек араны делимитациялоону тездетүү боюнча макулдашты

Грузия менен Азербайжан чек араны делимитациялоо жана демаркациялоо процессин тездетүү боюнча макулдашты. Oxu.az "Report"ка таянып кабар бергендей, бул тууралуу Грузиянын Премьер-министри Ираклий Кобахидзе журналисттерге берген маегинде айтты.

Анын айтымында, талкууда Кешикчидаг (Гареджи) монастыры жана анын айланасындагы аймакка байланыштуу маселелер да каралган. Бул маселе Азербайжан менен Грузиянын Экономикалык кызматташтык боюнча Өкмөттөр аралык комиссиясынын 11-жолку жыйынында жана эки өлкөнүн премьер-министрлеринин эки жактуу жолугушуусунда талкууланган. Премьер-министр тараптар делимитациялоо жана демаркациялоо иштерин тездетүү боюнча макулдашканын белгиледи.

Кобахидзе акыркы жылдары чек араны делимитациялоо жана демаркациялоо боюнча прогресс болбогонун, чечилбеген 15 бөлүк бар экенин жана алардын баары боюнча активдүү иштеш керектигин айтты. Анын айтымынча, негизги максат маселени принципиалдуу чечүү, ал үчүн процессти аяктоо маанилүү. Ал Азербайжан тарабынын тездетүү сунушуна оң жана ачык мамиле көрсөткөнүн да кошумчалады.