Кыргызстан тоолор жана тузсуз суу экосистемалары боюнча Ереван платформасын колдоду

Ереван шаарында Бириккен Улуттар Уюмунун Биологиялык ар түрдүүлүк жөнүндөгү конвенциясынын тараптарынын 17-конференциясынын (COP17) алкагында тоолор жана алар менен байланышкан тузсуз суу экосистемалары боюнча Ереван платформасы расмий түрдө ачылды. Жаңы эл аралык демилге тоолуу өлкөлөрдүн уникалдуу экосистемаларын коргоо, каржылоону тартуу жана эл аралык кызматташтыкты өнүктүрүү боюнча аракеттерин бириктирүүгө багытталган. Лидерлер саммитинде президент Садыр Жапаров платформаны түзүүнү колдоп, анын ишине активдүү катышууга даяр экенин билдирип, Ысык-Көлдүн экосистемасын сактоонун маанилүүлүгүн белгиледи.

Президенттин тоо күн тартибы боюнча атайын өкүлү Динара Кемелова жетектеген делегация COP17 алкагында бир катар жогорку деңгээлдеги иш-чараларга катышты. Кемелова эл аралык коомчулукту тоо экосистемаларын коргоого көбүрөөк көңүл буруга жана тоолуу өлкөлөрдүн каржылоо булактарына жеткиликтүүлүгүн кеңейтүүгө чакырды. Кыргызстан Глобалдык экологиялык фонддун алкагында атайын тоо программасын, Бишкек шаарында Тоолуу аймактардын туруктуулугу боюнча Глобалдык борборду жана Ысык-Көлдү коргоо максатындагы БУУнун колдоосу менен трасттык фондду түзүүнү сунуштады.

COP18 өткөрүлгөнгө чейин Тоо биоартүрдүүлүгү боюнча иш программасын жаңылоо жөнүндө чечим кабыл алынды. Кумар Мамбеталиев Биоартүрдүүлүк жөнүндөгү конвенциянын Тараптарынын конференциясынын бюросуна кайрадан шайланды.