Алиев: БУУ КККнын чечимдерин аткаруу механизмдери түзүлмөйүнчө согуштар улана берет

Азербайжан президенти Ильхам Алиев Бакуда өтүп жаткан Азиядагы өз ара аракеттенүү жана ишеним чаралары боюнча кеңешмеге (АӨАИЧК) катышуучу мамлекеттердин 7-саммитинде сөз сүйлөп, БУУнун Коопсуздук Кеңеши жана башка эл аралык уюмдар кабыл алган чечимдерди жана резолюцияларды аткарууну камсыздаган механизмдер иштелип чыкмайынча согуштар менен чыр-чатактар улана берээрин жана жаңылары пайда боло берээрин билдирди.

Алиев оккупациянын маңызын жана мүнөзүн, ошондой эле азербайжан элинин тарыхый Жеңишин толук түшүнүү үчүн коноктор Жеңиш паркына, Жеңиш музейине жана Аскер олжолору паркына барып көрө аларын белгиледи. Саммит Азербайжандын төрагалыгы астында өтүүдө. Анда АӨАИЧКны трансформациялоо процессинин 2022-жылдан бери жүрүп жаткан жылыштары, ошондой эле Азербайжандын төрагалыгынын жыйынтыктары каралат.

Саммиттин эң маанилүү жыйынтыктарынын бири катары Лаосту АӨАИЧКка жаңы мүчө катары кабыл алуу эсептелет. Башкы саясий документ Баку декларациясы болушу күтүлүүдө. Анда Азербайжандын төрагалыгы жактырылып, эл аралык тартип, толеранттуулук, маданияттар аралык диалог жана жасалма интеллект маселелери каралат. Андан тышкары эмгекти жана ден соолукту коргоо боюнча өзүнчө билдирүү кабыл алуу пландалууда.