Russiýanyň Daşary işler ministrligi Eýrana syýahatdan wagtlaýyn saklanmagy maslahat berdi

Russiýanyň Daşary işler ministrligi, Eýran Yslam Respublikasy töwereginde ýagdaýyň ýene-de ýiti bolmak howpy galanlygy sebäpli ýurduň raýatlaryna bu ýurda wagtlaýyn syýahat etmekden saklanmagy maslahat berdi. Bu barada 5-nojabrda Moskwada geçirilen brifingde ministrligiň resmi wekili Mariýa Zaharowa habar berdi. Ol Eýran töwereginde täze ýiti ýagdaý howplary sebäpli Russiýa raýatlary üçin berlen maslahatlaryň öňki ýaly güýjünde galýandygyny aýtdy we ýagdaý düzelýänçä, öňki maslahatyna laýyklykda, şu wagt bu ýurda syýahat etmekden wagtlaýyn saklanmagy maslahat görýändigini belledi.

Diplomat Eýranda bolan Russiýa raýatlaryny has seresap bolmaga, adamlaryň köpçülikleýin ýygnanýan ýerlerinden, jemgyýetçilik çärelerinden we harby we döwlet obýektleriniň golaýyndaky sebitlerden uzak durmaga çagyrdy. Wekil ýagdaýy yzygiderli yzarlamagyň, Eýran häkimiýetleriniň resmi maglumatlaryna esaslanmagyň we olaryň görkezmelerine berk eýermegiň zerurdygyny nygtady.

Zaharowa foto we wideo düşürmek bilen baglanyşykly çäklendirmelere aýratyn üns berdi. Onuň sözlerine görä, möhüm ähmiýetli ulag we energetika infrastrukturasynyň, esasanam harby infrastrukturanyň foto we wideo düşürilmegi kategoriki maslahat berilmeýär.