Орусия жарандарына Иранга убактылуу баруудан тартынууну кеңеш берди

Орусиянын Тышкы иштер министрлиги Ислам Республикасы Иран айланасындагы кырдаалдын кайра курчушу коркунучу сакталып тургандыктан, өлкө жарандарына бул өлкөгө убактылуу сапар чегүүдөн тартынууну кеңеш берди. Бул тууралуу 5-ноябрда Москвадагы брифингде министрликтин расмий өкүлү Мария Захарова билдирди. Ал Иран тегерегиндеги жаңы курчуу коркунучтарына байланыштуу орус жарандарына берилген сунуштардын мурунку сыяктуу күчүндө калаарын айтты жана «Кырдаал жөнгө салынганга чейин, мурунку сунушубузга ылайык, азырынча бул өлкөгө сапар чегүүдөн убактылуу тартынууну сунуш кылабыз», — деди.

Дипломат Иранда жүргөн орус жарандарын этияттуу болууга, адамдар топтолуп жүргөн жайлардан, коомдук иш-чаралардан, ошондой эле аскердик жана мамлекеттик объекттердин жанындагы аймактардан алыс болууга чакырды. Захарова кырдаалды кылдат көзөмөлдөөнүн, Иран бийликтеринин расмий маалыматына таянуунун жана алардын көрсөтмөлөрүн катуу аткаруунун маанилүүлүгүн баса белгиледи.

Ал фото жана видео тартуу боюнча чектөөлөргө өзгөчө көңүл бурду. Анын айтымында, транспорттук жана энергетикалык инфраструктуранын маанилүү объекттерин, айрыкча аскердик инфраструктураны тартуу такыр сунушталбайт.