Rossiya tashqi ishlar vazirligi Eronga sayohatdan vaqtincha tiyilishni tavsiya qildi

Rossiya tashqi ishlar vazirligi Eron Islom Respublikasi atrofidagi vaziyat yana keskinlashish xavfi saqlanib qolgani sababli fuqarolariga bu mamlakatga vaqtincha sayohat qilishdan tiyilishni tavsiya qildi. Bu haqda 5-noyabr kuni Moskvada brifingda Rossiya tashqi ishlar vazirligi rasmiy vakili Mariya Zaxarova maʼlum qildi. U Eron atrofida yangi eskalatsiya xavflari fonida Rossiya fuqarolari uchun tavsiyalar avvalgidek kuchda ekanini aytdi va vaziyat barqarorlashguncha bu mamlakatga sayohat qilishdan vaqtincha tiyilishni maslahat berishini bildirdi.

Diplomat Eronda yurgan rossiyalik fuqarolarni ehtiyotkor boʻlishga, odamlar ommaviy toʻplanadigan joylar, jamoat tadbirlari hamda harbiy va davlat obyektlari yaqinidagi hududlardan uzoq turishga chaqirdi. Zaxarova vaziyatni diqqat bilan kuzatish, Eron hokimiyatlarining rasmiy maʼlumotlariga tayanish va ularning koʻrsatmalariga qatʼiy amal qilish zarurligini taʼkidladi.

U foto va video suratga olish boʻyicha cheklovlarga alohida eʼtibor qaratdi. Zaxarovaning aytishicha, muhim ahamiyatga ega transport va energetika infratuzilmasi obyektlarini, xususan harbiy infratuzilmani foto va video suratga olish qatʼiyan tavsiya etilmaydi.