Rusiya XİN vətəndaşlarına İrana müvəqqəti səfər etməməyi məsləhət görüb

Rusiya Xarici İşlər Nazirliyi, İran İslam Respublikası ətrafında vəziyyətin yenidən gərginləşməsi riskinin qalması ilə əlaqədar ölkə vətəndaşlarına müvəqqəti olaraq bu ölkəyə səfər etməkdən çəkinməyi məsləhət bilib. Bunu 5 noyabrda Moskvada keçirilən brifinqdə Rusiya XİN rəsmi nümayəndəsi Mariya Zaxarova deyib. O qeyd edib ki, İran ətrafında yeni eskalasiya riskləri fonunda Rusiya vətəndaşları üçün tövsiyələr əvvəlki kimi qüvvədədir və vəziyyət nizamlanana qədər bu ölkəyə səfər etməkdən müvəqqəti çəkinmək məsləhət görülür.

Diplomat İran ərazisində olan Rusiya vətəndaşlarını daha diqqətli olmağa, kütləvi toplaşma yerlərindən, ictimai tədbirlərdən və hərbi və dövlət obyektlərinin yaxınlığındakı ərazilərdən uzaq durmağa çağırıb. XİN nümayəndəsi vəziyyəti diqqətlə izləməyin, İran hakimiyyətinin rəsmi məlumatlarını əsas götürməyin və onların göstərişlərinə ciddi əməl etməyin vacibliyini vurğulayıb.

Zaxarova foto və video çəkilişlərinə dair məhdudiyyətlərə xüsusi diqqət çəkib. O, kritik əhəmiyyətli nəqliyyat və enerji infrastrukturu obyektlərinin, xüsusilə hərbi infrastrukturun foto və video çəkilişinin qətiyyən tövsiyə olunmadığını bildirib.