ABŞ, Azerbaýjan we Ermenistan TRIPP taslamasy üçin üçtaraplaýyn tehniki toparlar döretdi

Azerbaýjan, Ermenistan we ABŞ hökümetleri Halkara parahatçylyk we abadançylyk üçin Tramp ýoly (TRIPP) taslamasyny çalt durmuşa geçirmek maksady bilen üçtaraplaýyn tehniki meýilleşdirme toparlarynyň işine başlady. AZERTAC ABŞ-nyň Döwlet departamentine salgylanyp habar berýär, bu barada üç ýurduň hökümetleri 6-njy noýabrda bilelikdäki beýanat yaýratdy.

Beýanata görä, ABŞ Döwlet sekretarynyň Ýewropa we Ýewraziýa meseleleri boýunça kömekçisi Brendan Hanrahan, Ermenistanyň daşary işler ministriniň orunbasary Wahan Kostanýan we Azerbaýjanyň daşary işler ministriniň orunbasary Elnur Mammadow taslamany ösdürmek üçin toparlaryň işine start berdiler. Beýanatda forumyň üç ýurduň syýasy karar berijilerini we tehniki hünärmenlerini bir ýere jemläp, sebitde uzak möhletli durnuklylyk, ykdysady işjeňlik we söwda abadançylygy üçin bilelikde işlemäge mümkinçilik döredýändigi aýdylýar. Beýanatda şeýle hem 2025-nji ýylyň 8-nji awgustynda Prezident Donald Trampyň wasytachylygy bilen kabul edilen Parahatçylyk sammiti Beýannamasynyň ähmiýeti nygtalýar.

Ilkinji tapgyrda ulag we elektrik energiýasynyň geçirilişi ugurlary boýunça iki tehniki meýilleşdirme toparyny döretmek ylalaşyldy. Toparlar çylşyrymly tehniki meseleleri çözmäge, taslamanyň indiki tapgyrlaryna geçmäge we ýoluň sebitdäki beýleki infrastruktura torlary bilen utgaşdyrylmagyna hyzmat eder. Taraplar TRIPP taslamasynyň ähli komponentleriniň mümkin boldugyça gysga wagtda durmuşa geçirilmegine wepalydygyny täzeden tassyklaýarlar.