AQSH, Ozarbayjon va Armaniston TRIPP loyihasi uchun uch tomonlama texnik guruhlar tuzdi

Ozarbayjon, Armaniston va AQSH hukumatlari Xalqaro tinchlik va farovonlik uchun Tramp yoʻlagi (TRIPP) loyihasini tezlashtirish maqsadida uch tomonlama texnik rejalashtirish guruhlari ishini boshladi. AZERTAC AQSH Davlat departamentiga tayanib xabar berishicha, bu haqda uch davlat hukumatlari 6-noyabrda qoʻshma bayonot eʼlon qilgan.

Bayonotga koʻra, AQSH Davlat kotibining Yevropa va Yevroosiyo masalalari boʻyicha yordamchisi Brendan Hanrahan, Armaniston tashqi ishlar vazirining oʻrinbosari Vahan Kostanyan hamda Ozarbayjon tashqi ishlar vazirining oʻrinbosari Elnur Mammadov loyihani ilgari surish uchun guruhlar faoliyatiga start berishdi. Bayonotda forum uch davlatning siyosiy qaror qabul qiluvchi rasmiylari va texnik mutaxassislarini birlashtirib, mintaqada uzoq muddatli barqarorlik, iqtisodiy faollik va savdo farovonligi yoʻlida hamkorlikka imkon yaratayotgani taʼkidlangan. Shuningdek, 2025-yil 8-avgustda Prezident Donald Tramp vositachiligida qabul qilingan Tinchlik sammiti deklaratsiyasining ahamiyati qayd etilgan.

Dastlabki bosqichda transport va elektr energiyasini uzatish yoʻnalishlari boʻyicha ikkita texnik rejalashtirish guruhi tuzish kelishib olindi. Guruhlar murakkab texnik masalalarni hal etish, loyihaning keyingi bosqichlariga oʻtish hamda yoʻlakni mintaqadagi boshqa infratuzilma tarmoqlari bilan uygʻunlashtirishga xizmat qiladi. Tomonlar TRIPP loyihasining barcha komponentlarini imkon qadar qisqa muddatda amalga oshirishga sodiqliklarini yana bir bor tasdiqladi.