ABŞ, Azərbaycan və Ermənistan TRIPP layihəsi üzrə üçtərəfli texniki qruplar yaradıb

Azərbaycan, Ermənistan və ABŞ hökumətləri Beynəlxalq Sülh və Rifah naminə Tramp Marşrutunun (TRIPP) həyata keçirilməsini sürətləndirmək məqsədilə üçtərəfli texniki planlaşdırma qruplarının fəaliyyətinə başlayıblar. AZƏRTAC ABŞ Dövlət Departamentinə istinadla xəbər verir ki, bu barədə üç ölkənin hökumətləri noyabrın 6-da birgə bəyanat yayıb.

Bəyanata görə, ABŞ Dövlət katibinin Avropa və Avrasiya məsələləri üzrə köməkçisi Brendan Hanrahan, Ermənistan xarici işlər nazirinin müavini Vahan Kostanyan və Azərbaycan xarici işlər nazirinin müavini Elnur Məmmədov layihənin irəlilədilməsi üçün qrupların fəaliyyətinə start veriblər. Bəyanatda deyilir ki, forum üç ölkənin siyasi qərar qəbul edən rəsmilərini və texniki mütəxəssislərini bir araya gətirərək regionda uzunmüddətli sabitlik, iqtisadi fəallıq və ticarət rifahı üçün birgə fəaliyyətə şərait yaradır. Bəyanatda, həmçinin 2025-ci il avqustun 8-də Prezident Donald Trampın vasitəçiliyi ilə qəbul edilmiş Sülh Sammiti Bəyannaməsinin əhəmiyyəti vurğulanıb.

İlkin mərhələdə nəqliyyat və elektrik enerjisinin ötürülməsi istiqamətləri üzrə iki texniki planlaşdırma qrupunun yaradılması razılaşdırılıb. Qruplar mürəkkəb texniki məsələlərin həllinə, layihənin növbəti mərhələlərinə keçidə və marşrutun digər regional infrastruktur şəbəkələri ilə əlaqələndirilməsinə xidmət edəcək. Tərəflər TRIPP layihəsinin bütün komponentlərinin mümkün qədər qısa müddətdə həyata keçirilməsinə sadiqliklərini yenidən təsdiqləyiblər.