Erdogan 8-nojabrda Azerbaýjanyň Zapar güni mynasybetli Bakuwa sapar etmegi meýilleşdirýär

Türkiýäniň Prezidenti Resep Tayyp Erdogan 8-nojabrda Azerbaýjanyň Zapar güni mynasybetli Bakuwa sapar etmegi meýilleşdirýändigini aýtdy. Ol bu barada Günorta Koreýa saparyndan dolanyp barşynda žurnalistlere mälim etdi.

Bu beýanat soňky günlerde Azerbaýjan-Türkiýe gatnaşyklarynyň çekişilýän wagtyna gabat geldi. Halkara metbugatda iki ýurduň arasynda käbir tapawutlar bardygy barada maglumatlar ýaýrady. Erdogan gatnaşyklaryň umumy taryha, medeniýete we doganlyga esaslanýandygyny nygtady we sapar wagtynda zerur ädimleriň ätiljegine umyt edýändigini aýtdy.

Modern.az-a pikir bildiren Azerbaýjan parlamentiniň deputaty Jawanşir Feýziýew «ýurtlaryň arasyndaky tapawut» düşünjesini dogry hasap etmeýändigini aýtdy. Onuň sözlerine görä, Ministrler Kabinetiniň hijaba degişli karary barada iki ýurtda-da ýeke pikir ýok, bahs ýurtlaryň arasynda däl, jemgyýetleriň içinde dowam edýär. Ol Erdoganyň Zapar gününde ýurda gelmeginiň doganlygyň we ittifaklygyň döwülmezdigini görkezýändigini belledi we Haýdar Aliýewiň «bir millet — iki döwlet» formulyny hem-de 2021-nji ýylyň Şuşa Beýannamasyny ýatlatdy.