Özbegistanda “Halka” podstansiýasy işe girizildi, Taşkent ÝES mazut ýakmazlygy mümkin

Özbegistanyň Energetika ministrliginiň habar hyzmaty 7-noýabrda ýurdun energetika ulgamynyň iri infrastruktur taslamalaryndan biri bolan täze 500 kV-lik “Halka” podstansiýasyna gerginlik berlendigini habar berdi. 1 602 MVA kuwwaty bolan bu obýekt Özbegistandaky iň iri we häzirki zaman ýokary gerginlikli desgalaryň biridir.

Podstansiýa Taşkent şäherinde we Taşkent welaýatynyň bir böleginde elektrik üpjünçiligini has-da pugtalandyrar we bar elektrik torlaryna düşýän ýüklemäni rejeli paýlamaga mümkinçilik berer. Ýüklemäniň täzeden paýlanmagy netijesinde Taşkent ýylylyk elektrik stansiýasyna düşýän ýük azalar we stansiýada mazut ýangyjyny ulanmaga zerurlyk galmaz.

Ministrligiň belläp geçişine görä, taslama paýtagtda we oňa çäkdeş ýerlerde ekologiki ýagdaýy gowulandyrmaga, atmosferä zyňylýan hapalaýjy maddalary azaltmaga-da ugrukdyrylan. Umumy bahasy 171,4 million ABŞ dollaryna barabar bolan taslama Dünýä banky gatnaşmagynda amala aşyryldy we 285 kilometr ýokary gerginlikli elektrik geçiriji liniýalar gurnaldy. Täze desgalaryň birleşdirilen energetika ulgamyna doly integrasiýasy boýunça soňky işler dowam edýär.