Özbəkistanda “Halqa” yarımstansiyası işə salındı, Daşkənd İES mazutdan imtina edə bilər

Özbəkistan Energetika Nazirliyinin informasiya xidmətinin verdiyi məlumata görə, ölkənin enerji infrastrukturunun böyük layihələrindən biri olan yeni 500 kV-luq “Halqa” yarımstansiyasına 7 noyabr tarixində gərginlik verilib. Gücü 1 602 MVA olan bu obyekt Özbəkistandakı ən böyük və müasir yüksək gərginlikli qurğulardan biridir.

Yarımstansiya Daşkənd şəhərində və Daşkənd vilayətinin bir hissəsində elektrik enerjisi təchizatını daha da möhkəmləndirəcək və mövcud elektrik şəbəkələrinə düşən yükün səmərəli bölüşdürülməsinə imkan verəcək. Yükün yenidən bölüşdürülməsi nəticəsində Daşkənd İstilik Elektrik Stansiyasının yükü azalacaq və stansiyada mazut yanacağından istifadəyə ehtiyac qalmayacaq.

Nazirliyin bildirdiyinə görə, layihə paytaxtda və ona bitişik ərazilərdə ekoloji vəziyyətin yaxşılaşdırılmasına, atmosferə buraxılan çirkləndirici maddələrin azaldılmasına da yönəlib. Dəyəri 171,4 milyon ABŞ dolları olan layihə Dünya Bankının iştirakı ilə həyata keçirilib və 285 kilometr yüksək gərginlikli elektrik ötürücü xətlər çəkilib. Yeni obyektlərin vahid enerji sisteminə tam inteqrasiyası üzrə yekun işlər davam edir.