Oʻzbekiston: “Halqa” podstansiyasi ishga tushdi, Toshkent IES mazutdan voz kechishi mumkin

Energetika vazirligi axborot xizmatining xabar berishicha, Oʻzbekistonda yirik infratuzilma loyihalaridan biri — 500 kV li yangi “Halqa” podstansiyasiga 7-noyabr kuni kuchlanish berildi. 1 602 MVA quvvatga ega ushbu obyekt mamlakatdagi eng yirik va zamonaviy yuqori kuchlanishli inshootlardan biridir.

Podstansiya Toshkent shahri va Toshkent viloyatining bir qismida elektr taʼminotini mustahkamlaydi hamda tarmoqlardagi yuklamani maqbul taqsimlash imkonini beradi. Natijada Toshkent issiqlik elektr stansiyasiga tushadigan yuklama kamayadi va stansiyada mazut yoqilgʻisidan foydalanish ehtiyoji qolmaydi.

Vazirlikning qayd etishicha, loyiha poytaxt va unga tutash hududlarda ekologik vaziyatni yaxshilash, atmosferaga chiqariladigan ifloslantiruvchi moddalarni kamaytirishga ham qaratilgan. Umumiy qiymati 171,4 million AQSH dollari boʻlgan loyiha Jahon banki ishtirokida amalga oshirilgan boʻlib, 285 kilometr yuqori kuchlanishli elektr uzatish tarmoqlari barpo etilgan. Yakuniy ishlar esa davom etmoqda.