Erdoʻgʻan 8-noyabrda Ozarbayjonning Zafar kuni munosabati bilan Bokuga boradi

Turkiya Prezidenti Rajab Tayyip Erdoʻgʻan 8-noyabrda Ozarbayjonning Zafar kuni munosabati bilan Bokuga tashrif buyurishni rejalashtirayotgani maʼlum qilindi. U bu haqda Janubiy Koreyaga safaridan qaytayotganda jurnalistlarga aytdi.

Bu bayonot soʻnggi kunlarda Ozarbayjon va Turkiya munosabatlari muhokama qilinayotgan bir paytga toʻgʻri keldi. Xalqaro ommaviy axborot vositalarida ikki davlat oʻrtasida ayrim kelishmovchiliklar borligi haqida xabarlar tarqalgan. Erdoʻgʻan munosabatlar umumiy tarix, madaniyat va birodarlikka asoslanganini taʼkidlab, tashrif davomida zarur qadamlar tashlanishiga umid qilishini aytdi.

Modern.azʼga fikr bildirgan ozarbayjonlik deputat Javanshir Feyziyev «davlatlar oʻrtasidagi kelishmovchilik» iborasini toʻgʻri deb hisoblamasligini aytdi. Uning fikricha, hijobga oid Vazirlar Mahkamasi qaroriga ikki mamlakatda ham yagona fikr yoʻq, bahs davlatlar oʻrtasida emas, fuqarolik jamiyatlari ichida ketmoqda. U Erdoʻgʻanning Zafar kunida kelishi birodarlik va ittifoqchilikning sarsilmasligini koʻrsatishini aytdi hamda Heydar Aliyevning «bir millat — ikki davlat» formulasi va 2021-yildagi Shusha deklaratsiyasini eslatdi.