Feridun Sinirlioglu: BMG Şertnamasy Kipr meselesinde işimde ýol görkeziji bolar

Türkiýäniň Birleşen Milletler Guramasynyň Baş sekretarlygyna dalaş edýän Feridun Sinirlioglu saýlanan halatynda garaşsyz we bitarap hereket etjekdigini aýtdy. Häzirki wagtda Ýewropa Howpsuzlyk we Hyzmatdaşlyk Guramasynyň (EHHG) Baş sekretarynyň wezipesini ýerine ýetirýän Sinirlioglu, BMG-niň Baş gerargähinde dalaş edýänler bilen geçirilen interaktiw dialog ýygnagynda çaknyşyklaryň öňüni almakda we çözmekde diplomatiýany we halkara hukugyny esas aljakdygyny belledi.

Ol BMG-niň Baş sekretarlygyna näme üçin dalaş edýändigini “BMG-ni kämil hasaplaýanym üçin däl, onuň aýrylmaz zerurlygyna ynanýanym üçin şu ýerdeýin” diýen sözler bilen düşündirdi. Ýygnakda grek-kipr tarapy BMG-däki doýmy wekili Mariýa Maýkl Kipr Respublikasynyň ýagdaýy, 2023-nji ýylda Pilede bolan wakalar, ýapyk Maraş we BMG Howpsuzlyk Geňeşiniň kararlary barada soraglar berdi. Sinirlioglu soraglara aýry-aýrylykda jogap bermän, saýlanan halatynda işini BMG Şertnamasy çäginde ýerine ýetirjekdigini aýtdy.

Gresiýa bolsa Türkiýe bilen Liwiýanyň arasynda baglaşylan deňiz ygtyýarlyklary ylalaşygy barada soraglar berdi. Sinirlioglu Türkiýe tarapyndan dalaş edilýändigine garamazdan, saýlanan halatynda Türkiýäni wekilçilik etmejekdigini, öz ýurdunyň wekili däl-de, garaşsyz halkara wezipeli adam hökmünde hereket etjekdigini belledi. Metbugat konferensiýasynda-da “Men bitarap we garaşsyz Baş sekretar bolaryn” diýip, şol pikiri gaýtalady.