Feridun Sinirlioʻglu: BMT Nizomi Kipr masalasida ishimga yoʻl-yoʻriq boʻladi

Turkiyaning Birlashgan Millatlar Tashkiloti Bosh kotibi lavozimiga nomzodi Feridun Sinirlioʻglu saylangan taqdirda mustaqil va xolis harakat qilishini aytdi. Hozirda Yevropada xavfsizlik va hamkorlik tashkiloti (EXHT) Bosh kotibi vazifasini bajarayotgan Sinirlioʻglu, BMT Bosh qarorgohida nomzodlar bilan oʻtkazilgan interaktiv muloqot yigʻilishida nizolarning oldini olish va hal etishda diplomatiya va xalqaro huquqni asos qilishini bildirdi.

U BMT Bosh kotibligiga nomzodligining sababini “BMTni nuqsonsiz deb oʻylaganim uchun emas, uning ajralmas ekanligiga ishonganim uchun shu yerdaman” soʻzlari bilan tushuntirdi. Yigʻilishda Yunon-kipr tomoni BMTdagi doimiy vakili Mariya Maykl Kipr Respublikasining maqomi, 2023 yilda Pileda sodir boʻlgan voqealar, yopiq Maraş va BMT Xavfsizlik Kengashi qarorlari boʻyicha savollar berdi. Sinirlioʻglu savollarga alohida javob bermay, saylangan taqdirda vazifasini BMT Nizomi doirasida bajarishini aytdi.

Gretsiya esa Turkiya va Liviya oʻrtasida imzolangan dengiz yurisdiksiyasi memorandumi haqida savol berdi. Sinirlioʻglu Turkiya tomonidan nomzod etib koʻrsatilganini, lekin saylangan taqdirda Turkiyani vakillik qilmasligini, oʻz mamlakati vakili emas, balki mustaqil xalqaro mansabdor sifatida ish tutishini bildirdi. Matbuot anjumanida ham “Men xolis va mustaqil Bosh kotib boʻlaman” deb takrorladi.