Özbegistan Prezidenti BAE-niň maýadarlaryny kabul etdi

Özbegistanyň Prezidenti Şawkat Mirziýoýew Daşkentde ýangyç-energetika pudagy boýunça Investorlar geňeşiniň birinji mejlisi çäginde Birleşen Arap Emirlikleriniň öňdebaryjy kompaniýalarynyň ýolbaşçylaryny kabul etdi. Duşuşykda Masdar kompaniýasynyň baş ýerine ýetiriji direktory Muhammad Jamil Al-Ramahi we AMEA Power kompaniýasynyň geňeş başlygy Husein Al-Nowaýs gatnaşdy.

Duşuşykda Emirlikler bilen strategik hyzmatdaşlygyň dinamiki ösüşi begenç bilen bellenildi. Ýylyň başyndan bäri özara söwda göwrümi 40 göterim ösdi we iri maýa goýum taslamalary üstünlikli durmuşa geçirilýär.

Duşuşygyň netijesinde ýaşyl energetika, häzirki zaman infrastrukturasy, pudak we senagat hyzmatdaşlygy, turizm we hyzmat ediş pudaklary boýunça taslamalary çaltlaşdyrmak we giňeltmek barada ylalaşyga gelindi.