Daniýada 8,8 million adamyň maglumatlary “123456” parol arkaly ogurlanypdyr

Daniýanyň häkimiýet orunlary Merkezi ilat hasaba alyş ulgamyna (CPR) edilen siber hüjümiň millionlarça raýatyň şahsy maglumatlarynyň syzmagyna sebäp bolandygyny tassyklady. 5-nji oktýabrda resmiler takmynan 8,8 million adamyň ady, salgysy we şahsy identifikasiýa belgilerine rugsatsyz girilendigini bildirdi.

Gözleg görkezdi, hakerler döwlet ulgamyny gönüden-göni döwmek ýerine, ýazgylary sorag etmek hukugy bolan “Pays ApS” IT kompaniýasynyň giriş maglumatlaryndan peýdalanypdyr. “Politiken” gazetiniň gözleginiň esasynda, hüjümçi kompaniýanyň öňki işgäriniň syzdyrylan hasaplaryny ulanypdyr; administrator hasaby hem goşulyp, azyndan üç hasapda parol hökmünde “123456” bellenipdir. Kompaniýanyň direktory Sofi Laursen girişiň ogurlanandygyny tassyklady.

“The Register” neşiriniň maglumatyna görä, kiberhüjümçiler 10-njy sentýabrdan 20-nji sentýabra çenli ulgama 14 million awtomatlaşdyrylan sorag iberipdir. Waka 2-nji oktýabrda, kompaniýa adatdan daşary ýokary hyzmat tölegi fakturasy alandan soň mälim boldy. Hüjümçi ele geçiren maglumatlaryny satmak ýa-da paýlaşmak niýetinde däldigini aýtdy. Daniýanyň hukuk goraýjy edaralary kompaniýanyň döwlet reýestrine girişini derhal bloklady we giň gerimli polisiýa derňewi başlandy.