Danimarkada 8,8 milyon insanın məlumatları “123456” parolu ilə oğurlanıb

Danimarkada Mərkəzi Əhali Qeydiyyatı Sistemi (CPR) üzərində həyata keçirilən kiberhücum milyonlarla vətəndaşın şəxsi məlumatlarının sızmasına səbəb olub. Danimarka hakimiyyət orqanları oktyabrın 5-də təxminən 8,8 milyon insanın adı, ünvanı və fərdi identifikasiya nömrələrinə icazəsiz giriş əldə edildiyini təsdiqləyib.

Araşdırmalar göstərib ki, hakerlər dövlət sistemini birbaşa sındırmaq əvəzinə, qeydləri sorğulamaq hüququ olan “Pays ApS” adlı İT şirkətinin giriş məlumatlarından istifadə ediblər. “Politiken” qəzetinin araşdırmasına görə, hücumçu şirkətin keçmiş işçisinə məxsus sızdırılmış hesablardan istifadə edib; admin hesabı da daxil olmaqla ən azı üç hesabda parol “123456” olub. Şirkətin direktoru Sofi Laursen giriş məlumatlarının oğurlandığını təsdiqləyib.

“The Register” nəşrinin məlumatına görə, kiberhücumçular sentyabrın 10-dan 20-dək 14 milyon avtomatlaşdırılmış sorğu həyata keçiriblər. Hadisə yalnız oktyabrın 2-də, şirkət qeyri-adi dərəcədə yüksək xidmət haqqı fakturası aldıqdan sonra üzə çıxıb. Hücumu təşkil edən şəxs əldə etdiyi məlumatları satmaq və ya paylaşmaq niyyətində olmadığını bildirib. Danimarka hüquq-mühafizə orqanları şirkətin dövlət reyestrinə çıxışını dərhal bloklayıb və geniş miqyaslı polis təhqiqatı başlayıb.