ABŞ Merkezi Aziýa döwletleri bilen gatnaşyklary ileri tutýar – Rubio

ABŞ Merkezi Aziýa döwletleri bilen gatnaşyklaryň ösüşini ileri tutýar we region ýurtlary bilen hyzmatdaşlygy has-da çuňlaşdyrmagy maksat edinýär. Bu barada ABŞ-nyň döwlet sekretary we prezidentiň milli howpsuzlyk meseleleri boýunça kömekçisi Marko Rubio Özbegistana sapara çykmazdan öň žurnalistlere beren açyklamasynda habar berdi.

Rubiniň sözlerine görä, Merkezi Aziýanyň beýleki dört ýurdy bilen gatnaşyklar hem ABŞ üçin uly ähmiýete eýe. Region döwletleri bilen gönüden-göni aragatnaşygyň dowam etdirilmegi hyzmatdaşlygy pugtalandyrmakda möhüm rol oýnaýar. Döwlet sekretary geljek saparynyň strategik ähmiýete eýedigini nygtady.

Sapar çäklerinde Rubio C5+1 formatynda daşary işler ministrleriniň duşuşygyna gatnaşar we Merkezi Aziýa ýurtlarynyň wekilleri bilen ikitaraplaýyn gepleşikler geçirer. 2015-nji ýylda döredilen C5+1 platformasy ABŞ-y we Gazagystany, Gyrgyzystany, Täjigistany, Türkmenistany hem-de Özbegistany birleşdirýär. ABŞ Döwlet departamentiniň maglumatyna görä, Özbegistana 200-den gowrak amerikan kompaniýasynyň wekilleri hem sapar eder. Waşington bu saparyň ABŞ bilen Merkezi Aziýa arasyndaky söwda gatnaşyklarynda täze tapgyryň esasyny goýjakdygyna umyt edýär.