АҚШ Орталық Азия елдерімен қарым-қатынасты дамытуды басым деп санайды

АҚШ Орталық Азия мемлекеттерімен қарым-қатынасты дамытуды басым бағыт деп санайтынын және өңір елдерімен ынтымақтастықты одан әрі тереңдетуді көздейтінін мәлім етті. Бұл туралы АҚШ мемлекеттік хатшысы және президенттің ұлттық қауіпсіздік мәселелері жөніндегі көмекшісі Марко Рубио Өзбекстанға сапарға шықпас бұрын журналистерге мәлімдеді.

Рубионың сөзінше, «бұл тек Өзбекстан туралы емес. Орталық Азияның басқа төрт елімен қарым-қатынас та біз үшін үлкен маңызға ие». Ол өңір мемлекеттерімен тікелей байланыс ынтымақтастықты нығайтуда маңызды рөл атқаратынын айтып, алдағы Өзбекстанға сапардың стратегиялық маңызы бар екенін атап өтті.

Сапар аясында Рубио C5+1 форматындағы сыртқы істер министрлерінің кездесуіне қатысып, Орталық Азия елдерінің өкілдерімен екіжақты келіссөздер жүргізеді. 2015 жылы құрылған C5+1 платформасы АҚШ пен Орталық Азияның бес мемлекетін, атап айтқанда Қазақстанды, Қырғызстанды, Тәжікстанды, Түркменстанды және Өзбекстанды біріктіреді. АҚШ Мемлекеттік департаментінің мәліметінше, Өзбекстанға 200-ден астам жетекші америкалық компанияның өкілдері де барады. Вашингтон бұл сапар АҚШ пен Орталық Азия елдері арасындағы сауда қарым-қатынасында жаңа кезеңнің негізін қалайтынына үміттенеді.