AQSh Markaziy Osiyo davlatlari bilan munosabatlarni rivojlantirishni ustuvor deb hisoblaydi

AQSh Markaziy Osiyo davlatlari bilan munosabatlarni rivojlantirishni ustuvor deb hisoblashini va mintaqa mamlakatlari bilan hamkorlikni yanada chuqurlashtirishni maqsad qilganini bildirdi. Bu haqda AQSh davlat kotibi hamda prezidentning milliy xavfsizlik masalalari boʻyicha yordamchisi Marko Rubio Oʻzbekistonga safarga joʻnashdan oldin jurnalistlarga aytgan.

Rubio, “Gap faqat Oʻzbekiston haqida ketmayapti. Markaziy Osiyoning boshqa toʻrt davlati bilan munosabatlar ham biz uchun katta ahamiyatga ega”, dedi. Uning soʻzlariga koʻra, mintaqa davlatlari bilan bevosita aloqalarni davom ettirish hamkorlikni mustahkamlashda muhim rol oʻynaydi. Davlat kotibi Oʻzbekistonga kelajakdagi safarining strategik ahamiyatga ega ekaninitaʼkidladi.

Safar doirasida Rubio C5+1 formatidagi tashqi ishlar vazirlari uchrashuvida ishtirok etadi hamda Markaziy Osiyo mamlakatlari vakillari bilan ikki tomonlama muzokaralar oʻtkazadi. 2015-yilda tashkil etilgan C5+1 platformasi AQShni Qozogʻiston, Qirgʻiziston, Tojikiston, Turkmaniston va Oʻzbekistondan iborat Markaziy Osiyoning besh davlati bilan birlashtiradi. AQSh Davlat departamenti maʼlumotiga koʻra, Oʻzbekistonga 200 dan ortiq yetakchi amerikalik kompaniya vakillari ham boradi. Vashington bu safar AQSh va Markaziy Osiyo davlatlari oʻrtasidagi savdo aloqalarini rivojlantirishda yangi bosqichga asos solishiga umid qilmoqda.