ABŞ Mərkəzi Asiya dövlətləri ilə münasibətlərin inkişafını prioritet hesab edir

ABŞ Mərkəzi Asiya dövlətləri ilə münasibətlərin inkişafını prioritet hesab etdiyini və region ölkələri ilə əməkdaşlığı daha da dərinləşdirməyi hədəflədiyini bildirib. Bu barədə ABŞ dövlət katibi və prezidentin milli təhlükəsizlik məsələləri üzrə köməkçisi Marko Rubio Özbəkistana səfərə yola düşməzdən əvvəl jurnalistlərə açıqlama verib.

Rubio, “Burada söhbət yalnız Özbəkistandan getmir. Mərkəzi Asiyanın digər dörd ölkəsi ilə münasibətlər də bizim üçün böyük əhəmiyyət daşıyır” deyib. Onun sözlərinə görə, region dövlətləri ilə birbaşa əlaqələrin davam etdirilməsi əməkdaşlığın möhkəmləndirilməsi baxımından mühüm rol oynayır. Dövlət katibi Özbəkistana qarşıdakı səfərin strateji əhəmiyyət daşıdığını vurğulayıb.

Səfər çərçivəsində Rubio C5+1 formatında xarici işlər nazirlərinin görüşünə qatılacaq və Mərkəzi Asiya ölkələrinin nümayəndələri ilə ikitərəfli müzakirələr aparacaq. 2015-ci ildə yaradılan C5+1 platforması ABŞ-ı Qazaxıstan, Qırğızıstan, Tacikistan, Türkmənistan və Özbəkistandan ibarət beş Mərkəzi Asiya dövləti ilə bir araya gətirir. ABŞ Dövlət Departamentinin məlumatına əsasən, Özbəkistana 200-dən çox aparıcı Amerika şirkətinin nümayəndəsi də səfər edəcək. Vaşinqton bu səfərin ticarət münasibətlərinin inkişafında yeni mərhələnin əsasını qoyacağına ümid edir.