Türkmenistanda manadyň 33 ýyllygyna ylmy-amaly konferensiýa geçiriler

Türkmenistanda milli pul birligi manadyň dolanyşyga girizilmeginiň 33 ýyllygy mynasybetli ylmy-amaly konferensiýa geçiriler. Konferensiýanyň temasy “Milli manat – täze taryhy döwürde çalt ösüşiň esasy” diýlip atlandyrylýar. Çäräniň taýýarlygy barada Premýer-ministriň orunbasary Hojamyrat Geldimyradow hepdäniň şenbe güni sanly formatda geçirilen Ministrler Kabinetiniň mejlisinde hasabat berdi. Bu barada Türkmenistanyň resmi metbugaty habar berdi.

Hasaba görä, konferensiýada gatnaşyjylara Prezident Serdar Berdimuhamedowyň durmuş-ykdysady ösüşe degişli başlangyçlary we bank ulgamyndaky giň möçberli özgertmeler tanyşdyrylar. Şeýle hem halkara maliýe guramalary bilen hyzmatdaşlygy has-da pugtalandyrmak meseleleri ara alnar. Şu baglanyşykda Premýer-ministriň orunbasary degişli teklibi döwlet Baştutanynyň garamagyna hödürledi.

Hasaby diňlän döwlet Baştutany Premýer-ministriň orunbasaryna manadyň dolanyşyga girizilmeginiň 33 ýyllygyna bagyşlanan konferensiýa laýyk derejede taýýarlanmagy tabşyrdy.