Mirziýoýew Gaşgadarýada 6 milliard dollardan gymmat taslamalary işe saldy

Özbegistanyň Prezidenti Şawkat Mirziýoýew Gaşgadarýa welaýatyna sapary dowamynda täze taslamalaryň işe girizilmegi we gurluşygynyň başlanmagy dabarasyna gatnaşdy. Döwlet baştutany soňky bäş ýylda welaýata 20 trillion som serişde ugrukdyrylandygyny we 7 milliard dollar daşary ýurt maýasynyň çekilendigini belledi.

Umumy bahasy 6 milliard dollardan gowrak bolan 161 taslama taýýarlanypdyr. Dabarada 69 taslama işe girizildi, ýene 92 taslamanyň gurluşygyna start berildi. Işe girizilýän 28 senagat kärhanasynda takmynan 7 müň doly wagtly iş orny döredilýär. Italiýanyň Cotonella markasy ýylda 8,5 million bölek taýýar trikotaj önümi öndürmegi göz öňünde tutýar.

Oksuw derýasynda umumy güýji 24 megawatt bolan üç gidroelektrik stansiýasy işe girizildi. Karşy etrabynda Hytaýyň Shanghai SUS kompaniýasy 150 million dollarlyk, galyndylardan elektrik energiýasy öndürýän zawody ýyl ahyryna çenli işe girizmegi meýilleşdirýär.