Mirziyoyev Qəşqədəryada 6 milyard dollardan çox dəyərli layihələri işə saldı

Özbəkistan Prezidenti Şavkat Mirziyoyev Qəşqədərya vilayətinə səfəri çərçivəsində yeni layihələrin işə salınması və tikintisinin başlanması mərasimində iştirak edib. Dövlət başçısı son beş ildə vilayətə 20 trilyon som vəsait yönləndirildiyini və 7 milyard dollar xarici investisiya cəlb edildiyini qeyd edib.

Ümumi dəyəri 6 milyard dollardan çox olan 161 layihə hazırlanıb. Mərasimdə 69 layihə işə salınıb, daha 92 layihənin tikintisinə start verilib. İşə salınan 28 sənaye müəssisəsində təxminən 7 min daimi iş yeri yaradılır. İtaliyanın Cotonella brendi ildə 8,5 milyon ədəd hazır trikotaj məhsulu istehsal etməyi planlaşdırır.

Oqsuv çayında ümumi gücü 24 meqavat olan üç hidroelektrik stansiyası işə salınıb. Çinin Shanghai SUS şirkəti Qarşı rayonunda 150 milyon dollarlıq tullantıdan elektrik enerjisi istehsal edən zavodu il sonunadək işə salmağı planlaşdırır.