Мирзиёев Қашқадария облысында 6 млрд доллардан асатын жобаларды іске қосты

Өзбекстан Президенті Шавкат Мирзиёев Қашқадария облысына сапары аясында жаңа жобаларды іске қосу және құрылысын бастау рәсіміне қатысты. Мемлекет басшысы соңғы бес жылда облысқа 20 триллион сом қаражат бағытталғанын және 7 млрд доллар шетелдік инвестиция тартылғанын атап өтті.

Жалпы құны 6 млрд доллардан асатын 161 жоба дайындалған. Рәсімде 69 жоба іске қосылып, тағы 92 жобаның құрылысына старт берілді. Іске қосылатын 28 өнеркәсіп кәсіпорнында шамамен 7 мың тұрақты жұмыс орны құрылуда. Италияның Котонелла бренди жылына 8,5 млн дана дайын трикотаж өнімін өндіруді жолға қойып жатыр.

Оқсу өзенінде жалпы қуаты 24 мегаватт үш гидроэлектр станциясы іске қосылды. Қарши ауданында Қытайдың Шанхай СУС компаниясы 150 млн долларлық қалдықтардан электр энергиясын өндіретін зауытты жыл соңына дейін іске қосуды жоспарлап отыр.