Özbegistanda çaga garyplygy 5 ýylda takmynan dört esse azaldy

Özbegistanyň Prezidenti Şawkat Mirziýoýew soňky bäş ýylda ýurtda çaga garyplygynyň takmynan dört esse azalandygyny, mekdebe çenli bilime gatnaşmagyň bolsa 27,7 %-den 78 %-e ýokarlandygyny aýtdy. Ol bu sözleri 21-nji oktýabrda Samarkantda açylan Geljek we çagalaryň abadançylygy boýunça Bütindünýä sammitiniň gatnaşyjylaryna ýüzlenende beýan etdi.

Döwlet baştutany çaganyň abadançylygynyň diňe onuň geljekki üstünlikleri ýa-da girdejisi nukdaýnazaryndan baha berip bolmajagyny nygtady. Her çaga häzirden başlap ideg, howpsuzlyk, hilli bilim we lukmançylyk kömegine hukuklydyr. «Çaganyň gymmaty geljekde haýsy hünäri saýlamagy ýa-da näçe girdeji getirmegi bilen ölçelmeýär», diýip, Mirziýoýew belledi.

Prezidentiň sözlerine görä, dogduk wagty ene ölümi we ösüşde gecikmesi bolan çagalaryň sany iki esse azalypdyr. Alty ýaşly çagalaryň takmynan 100 %-i mekdebe taýýarlyk bilen gurşalypdyr, ýokary bilime girmek mümkinçiligi bolsa 9 %-den 45 %-e çykypdyr. Soňky iki ýylda inklýuziw mekdepleriň sany bäş esse artypdyr we maýyp çagalaryň 85 %-den gowrak bölegi bilim hyzmatlaryndan peýdalanýar.