Özbəkistanda uşaq yoxsulluğu beş ildə təxminən dörd dəfə azalıb

Özbəkistan Prezidenti Şavkat Mirziyoyev bildirib ki, son beş ildə ölkədə uşaq yoxsulluğu təxminən dörd dəfə azalıb, məktəbəqədər təhsilə cəlb olunma isə 27,7 faizdən 78 faizə yüksəlib. O, bu sözləri oktyabrın 21-də Səmərqənddə açılmış Gələcək və Uşaqların Rifahı üzrə Ümumdünya Sammitinin iştirakçılarına müraciətində səsləndirib.

Dövlət başçısı vurğulayıb ki, uşağın rifahı yalnız onun gələcək uğurları və ya gəliri baxımından qiymətləndirilə bilməz. Hər uşaq bu gün də qayğı, təhlükəsizlik, keyfiyyətli təhsil və tibbi yardım almaq hüququna malikdir. «Uşağın dəyəri gələcəkdə hansı peşəni seçəcəyi və ya nə qədər gəlir gətirəcəyi ilə ölçülmür», deyə Mirziyoyev qeyd edib.

Prezident nəticələr arasında doğuş zamanı ana ölümünün və inkişafda gecikməsi olan uşaqların sayının yarıya endiyini bildirib. Altıyaşlı uşaqların demək olar ki, 100 faizi məktəbə hazırlıqla əhatə olunub, ali təhsilin əlçatanlığı isə 9 faizdən 45 faizə yüksəlib. Son iki ildə inklüziv məktəblərin sayı beş dəfə artıb və əlillik statusu olan uşaqların 85 faizindən çoxu təhsil xidmətləri ilə əhatə olunub.